Joh 20 | WSK | STEP | Ubou tumong biyala, sor munumuning karogo la, Maria Magdala imet ali motam te namaram, ale manga mutim korang te baguman mu me aniram se arigam.

John 20

Jesus barasam

(Mat 28:1-8; Mark 16:1-8; Luke 24:1-12)

1 Ubou tumong biyala, sor munumuning karogo la, Maria Magdala imet ali motam te namaram, ale manga mutim korang te baguman mu me aniram se arigam. 2 Buta se nu naguram namaram ale Simon-Peter se olekem bo Jesus ko kuakaso mu nongote namaram ale nunga maonam, “Nuna Kari Biya taman ilak namaman ale apalagaya beteman mu ana me ko ikisan!” mam.

3 Se Peter se olekem nukung mu buta naguman ale kuwim aringimonko namaman. 4 Bare olekem mu Peter kiaram ale nu giram nama mutim duap te aratam. 5 Ale tararam manga gogong ningi loagaram, mu guang biling biling te kaloman mu la ningi aniram se arigam. Bare nu me kasu naguram. 6 Se Simon-Peter udagi tairam mu dirmam manga gogong ningi nama naguram ale guang biling umutang arigam. 7 Ale guang biling bo Jesus supuling te kaloman mu agotala aniram se arigam. Guang biling mu guang sikina karogo bolala me aniram, mu moa nunguru kigilik beteman se aniram. 8 Se aking olekem giram manga gogong duap te tairam mu nu ago kasu naguram ale mel mu ago arigam ale gomang ningi nunguning aram. 9 Bare tom mu te nuna Kaem ko batoga balam Jesus kueruk ale barasukko mam mu ko duap ninguru me ko ikikasan. 10 Asele olekem ilagala peleman uningi namaman.

Maria Magdala imet Jesus arigam

(Mat 28:9-10; Mark 16:9-11)

11 Bare Maria mu am manga gogong kuring te sanamaram ale mo se bagakaso. Am mowa tararam manga gogong ningi loagaram, 12 ale engel ilagala guang siraram la naguman ale kuwim Jesus te bagaram mu te dagiwaman mu nungarkam, bo supuling ko se bo suwik ko dagi se animan. 13 Mu nuna Maria isarman, “Imet, ni anape ko mo lagasam a?” maman.

Se nu nunga maonam, “Nuna aninga Kari Biya taman ale apareyate beteman bare ani me ko ikisam!” 14 Nu iwita balam ale punga geraga Jesus sanamiwaram se arigam, bare Maria nu Jesus mu me ko ikikaso.

15 Se Jesus nu isuam, “Imet, ni anape ko mowasam a? Ale ni awiri ko loagasam a?”

Se Maria nu ikikaso mu kuwim umutang ko bitua ko kari i nu ilak munakoso ko bitakaso, ale maonam, “Kari, ni taem ilak nama kuwim i te beterem agi mu balu se ani namirik taikko.”

16 Se Jesus nu maonam, “Mariam,” mam. ^{▼▼John 20:16 John Greek den te den bataguruwa verse 16 imi te nup Maria meram ale Hebrew den te “Mariam” batogam. Mu awuk, Jesus kota ko den te butata Maria auram.} Se Maria giris palagam arigam ale auram, “Rabboni,” mam, mu Hebrew den te balam se ko nunguning iwita, “Kari biya”.

17 Jesus nu maonam, “Me aga ilupko,” mam. “Mu awuk, aninga Ait kote me nama tarigisam, aitak. Bare ni piler namar ale aga olekem iwita nunga manaruko, ani pelesam aga Ait, nononga Nonet, wore kote namasam, aninga Kaem se nononga Kaem.” ^{▼▼John 20:17 Jesus mu nongomang ningi nunguning alo nunga laun bagoso: Rom 8:29; Heb 2:11-12.}

18 Se Maria Magdala imet mu peleram namaram ale olekem nunga maonam, “Ani Kari Biya arigem!” makaso. Ale Jesus den nu maonam mu nunga manarukaso.

Olekem alo Jesus aringiman

(Mark 16:14-18; Luke 24:36-49)

19 Olekem alo Juda supuling bibiya nunga nguangakasan, ale ubou turom mu te kawam bo te biguwuman ale songkuring baguman kawam ningi la bagaman. Se Jesus tairam nunga ningi sanamaram ale balam, “Nenenga nengemang lila te bagaralko.” 20 Nu uwuta balam ale ko kuting nunga kausam ale ko beta nunga kausam. Se olekem alo Kari Biya aringiman ale nongomang ninguru amilmilakaso.

21 Se Jesus aking nunga maonam, “Nenenga nengemang lila te bagaralko! Ba aninga beteram se tairem iwitata ani ninga awusam, se namaralko.” 22 Nu uwuta nunga maonam ale kuring daula itugumam se nongote namaram se nunga maonam, “Ani Agarang Bur ningarsam. 23 Nina kari bo ko memek siwural, mu ko memek ta menaso. Bare nina kari bo ko memek me siwural, mu ko memek mu kumik te am anirukkowo.” ^{▼▼John 20:23 Memek siwura: Mat 16:19.}

Thomas Jesus arigam

24 Jesus butata olekem alo nongote aratam. Bare tom mu te olekem 12 nunga ningi bo mu nu nuna arungak me bagaram. Olekem mu Thomas, ko nup bo Didymus. 25 Butata se olekem saki nu manarukasan, “Ana Kari Biya aringiman,” makasan. Bare nu iwita nunga manarukaso, “Ani angamang ningi me nunguning aso,” makaso. Ale balukaso, “Ani nil kawilis kuting te arigek ale agiting peperek te kau taik, ale agiting bo beta te gatu kuruwim iluwek umutang asele ani angamang ningi nunguning arukko.”

26 Se udagi tom 8 namaram se olekem alo akingtala kawam ningi bagaman. Se tom mu Thomas arungak bagakaso. Nuna songkuring suen la bagu sapaman ale ningi bagaman, bare Jesus tai nunga ningi sanamaram ale balam, “Nenenga nengemang lila te bagaralko.” 27 Asele Thomas maonam, “Ka kiting peperek ago tair ale aninga agiting kawilis ilu arikko. Ka kiting garuku ale abeta kawilis ilu arikko. Gemang namara taira bitar ale gemang ningi nunguning arukko!”

28 Se Thomas nu maonam, “Ni aninga Kari Biya, ni aninga Kaem!”

29 Se Jesus nu maonam, “Ni agarkem ale ko gemang ningi nunguning aram e? Kariimet ani me agarkaman bare nongomang ningi nunguning aruk, mu kariimet umutang am amilmilomonko.” ^{▼▼John 20:29 Kariimet saki Jesus me aringiman bare am ko kuesan: 1 Peter 1:8.}

John ko batoga imi batogam mu ko duap

30 Jesus kilek suen biya tala ko olekem nomokete beteram se aringiman, bare ani kilek imi ko duap batoga imi te me batagem. Bare batoga tukunang imi ani batagem, mu nina te Jesus mu Kristus, Kaem ko Namar, mu ko nengemang ningi nunguning aruk, se nengemang ningi nunguning umutang te noko nup te marak ningo talko. ^{▼▼John 20:31 Kariimet Jesus ko nongomang ningi nunguning mu marak nunguning tasan: John 3:15; Rom 1:17; 1 John 5:11-13.}

31